विराटनगर । प्रदेश १ मा प्रमुख प्रतिपक्षी दल नेपाली कांग्रेसले कोरोना भाइरसको संक्रमण रोकथामका लागि भइरहेको प्रयासको जानकारी माग गरेको छ ।
बिहीबार बसेको प्रदेशसभा बैठकमा कांग्रेसका मुख्य सचेतक केदार कार्कीले कोरोना भाइरस (कोभिड १९) बाट विश्व त्रस्त रहेका अवस्थामा प्रदेशमा यसको रोकथाम र सतर्कताका लागि के भइरहेको छ भनी सरकारसँग जानकारी मागेका हुन् ।
कार्कीले कोरोना भाइरस (कोभिड १९) बाट विश्व त्रस्त रहेको अवस्थामा अफवाहको भरमा गलत क्रियाकलाप र कालोबजारी सुरु भएको पनि बताए ।
‘संक्रमण देखिए भारतले सीमा लक गर्छ । दबाइ पठाउन छाड्यो । ग्यासको अभाव सुरु भयो । सरकार के गर्दैछ ? खाद्यान्न छ कि छैन ? हामीसँग बोर्डरमा चेक गर्ने मेसिन, लगाउने उपकरण पोसाक छ कि छैन ?’ उनले भने ।
सांसद कार्कीले भारतीय सीमा बन्द भए पन्ध्र दिनमै भोकमरी लाग्ने भन्दै कार्कीले रोगभन्दा भोकमरीको त्रास भएको सुनाए । ‘‘दैनिक उपभोग्य वस्तुको त्रास भयो । झक्झक्याउन खोजेको हो,’ कार्कीले भने, ‘‘सरकार हाम्रो तयारी के छ ?’
प्रमुख प्रतिपक्षी दलले जवाफ माग गरेपछि समाजिक विकास मन्त्री जीवन घिमिरेले सदनमा उठेको विषयमा जवाफ दिँदै प्रदेशमा पनि उच्च सतर्कता र सावधानी अवलम्बन गरेको बताए ।
कोरोनाको संक्रमण भइहालेका खण्डमा त्यसको आवश्यक उपचारको व्यवस्था सरकारले मिलाएको जानकारी दिए । उनले प्रदेशका ६ वटा अस्पतालमा तयारी गरिएको जानकारी दिए ।
प्रकोप बारम्बार आउने भएकाले नियमन गर्नका लागि प्रदेश सरकारले आपत्कालीन स्वास्थ्य व्यवस्थापन केन्द्र कोसी अस्पताल परिसरमा निर्माण गरिएको र त्यो दुईचार दिनभित्रै सञ्चालनमा आउने बताए ।
‘यसको अर्थ उत्पात भइसक्यो । कहालीलाग्दो अवस्था र ज्यान जान लागिसक्यो भन्ने रूपमा बुझ्नु हुन्न । तर, सचेतना अपनाउनु पर्छ’ उनले भने ।
यहाँ प्रकाशित सामाग्री वा समाचारमा तपाईंको कुनै गुनासो भए हामीलाई [email protected] र [email protected] मा इमेल गरी प्रतिकृया दिन सक्नु हुने छ । आफ्नो वरपरको समाचार, सुचना, जानकारी, सुझाव र सल्लाहरु भए यही ठेगानामा पठाउन सक्नुहुनेछ । -सम्पादक हामीसँग तपाईं फेसबुक र ट्विटरमा पनि जोडिन सक्नुहुन्छ ।
